Դեսպան Տիգրան Բալայանի այցը և հանդիպումները Լյուվարդենում

01 ապրիլի, 2022

Ապրիլի 1-ին դեսպան Տիգրան Բալայանն աշխատանքային այցով եղավ Նիդերլանդների Ֆրիսլանդ մարզում։ Դեսպանը հյուրընկալվեց Լյուվարդեն քաղաքում տեղակայված Նիդերլանդների ջրային համալսարանում, այցելեց համալսարանի տարածքում գործող լաբորատորիաներ, որտեղ ոլորտի մասնագետները ներկայացրեցին ջրային կառավարման նիդերլանդական փորձը և գիտելիքները: Տ․ Բալայանը ծանոթացավ Նիդերլանդների կողմից ժամանակակից տեխնոլոգիաների կիրառմամբ իրականացվող հսկայածավալ նորարարական լուծումներին, որի շնորհիվ ստուգվում է խմելու ջրի որակը, կատարվում բազմաշերտ զտման աշխատանք՝ ապահովելու ջրային ռեսուրսների արդյունավետ օգտագործումը և շրջանաձև տնտեսության շարունակականությունը։

Տ․ Բալայանը նիդերլանդացի գործընկերներին ներկայացրեց ջրային ոլորտում Հայաստանի կարիքները, նախանշվեցին կոնկրետ ուղղություններով փոխգործակցություն հաստատելու գործնական մոտեցումները։

Դեսպանն այնուհետև հանդիպեց Լյուվարդենի քաղաքապետ Սիբրանտ ֆան Հարսմա Բյումաին։ Դեսպանը Լյուվարդենի քաղաքապետին առաջարկեց դիտարկել քաղաքային տնտեսության կառավարման և բարեփոխումների նիդերլանդական փորձը Հայաստանի ՏԻ մարմիներին փոխանցելու և ապակենտրոնացված համագործակցության խթանմանն ուղղված համատեղ ծրագրերի իրականացումը, ինչին քաղաքապետը դրական արձագանքեց։

Տ․ Բալայանի հաջորդ կանգառը Լյուվարդենի կաթնամթերքի համալսարանի և հետազոտությունների կենտրոնում էր, որը գործում է աշխարհահռչակ Վախենինգենի համալսարանի հովանու ներքո։ Կենտրոնի գործունեության վերաբերյալ շնորհանդեսից հետո դեսպանը շրջայց կատարեց տարբեր մասնաշենքերում տեղակայված արտադրամասեր, ծանոթացավ կաթի արտադրության և որակի ստուգման ամբողջ գործընթացին։

Կենտրոնի ղեկավարության հետ պայմանավորվածություն ձեռք բերվեց ոլորտի հայ մասնագետների համար վերապատրաստման դասընթացներ կազմակերպելու, ինչպես նաև Հայաստանում նմանօրինակ հաստատություն հիմնելու հեռանկարների շուրջ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր